بترجاك

بترجاك ..
للشاعرة / زبيدة أحمد مكى

بترجاك .. تفسّر لي
منو الأداك إذن تفرد ملامحك فيني
تسكن في حباب عيني
منو الأداك تأشيرة دخول
تدخل شراييني وتسافر فيْ
منو القال ليك تلاقيني
وتمد أيديكا تلمس فيني مكمن حيْ
بترجاك
توضّح لي
منو الأداك تصاريح للسكن جواي
مفاتيح لي مسارب الروح
مراجيح لي النفس والبوح
مصابيح في طريقي الجاي
شعاع في العتمة تشرق ضي ..
بترجاك
سألتك بالذي سواك
شنو الخلاك تبيع الغالي
بي أرخص رخيص وشوي
بعد ما عرفت كل البي
بقيت ليك زي كتاب مفتوح
محل ما رحت أنت تروح
وكونك عالمي الحوالي ..
..
شنو الخلاك تقسى علي ؟؟
وتنسى سنين وهبتها ليك
تتنكر لتحناني
منو القال ليكا تقسى عليّ ؟
من وين جاتك الفكرة
أكيد ما أنت .. زول تاني
عشان القسوة ما شبهك
ولا طبعك تكون جاني
ولا يمكن أصدق مرة منك
أنت دون الناس
واتوقع تصيبني جروح
وأنك أنت دون خلق الله
تقدر لحظة تنسى العشرة
تغدر بي

يــــــــــــــــــــا سلام عليكي تسلمي