من مذكرات طفولتي

الغنماية أم ضقلوم

دي الغنماية الماعندها قرون حقت ناس عمي (.......) ومن اهم صفاتها العناد وعدم الإكتراث لكمة ( تك ) والله كانت مكرهاني حياتي لما أكون في عز الصفاء بقرأ في المغامرون الخمسة ناس تختخ ونوسة ولوزة القصص المفضلة لدي اسمع صوت امي ( ياولد قوم انهر الغنماية دي) وقوم عليها لكنها كانت سريعة وتعرف هدفها تماماً لما إكتسبته من خبرة في بيتنا ( الطريق الى خمارة العجين ) وبسرعة البرق تدخل رقبتها وتنهل كم كاس قبل أن ادركها ولو تجرأت وضربتها في تلك اللحظة سوف تتهور هي بدورها وتدلق ماتبقى من عجين فلذا عليك الترفق بها ريثما تمسك زمارة رقبتها وبعدها تشبعها ركلاً وشتيمة واحياناً عضاً في أذنها حتى تسمع صوت ( مييييييييييييق ) ولكنها لاتيأس ولا تستسلم وتعيد المحاولة مرات ومرات في اليوم حتى يحل المساء وينام العالمين ولما كان باب الشارع متكول بحجر أو عود يسهل على الغنماية ان تدخل رأسها وتستكشف المكان ثم بقوة الضقلوم الضاربة تشرع الباب في تحدي واضح لكل قوانين الخصوصية أحترت معها واصابتني نفسيات من تلك الغنماية التي ماتركت لنا زرعة ولانبتة ولا شاردة ولا واردة إلا تناولتها كانت تكنس الأرض كنساً من كيس الى ورق جرايد ولكن الأمر الذي بلغ مني مبلغاً لم استطيع معه صبرا يوم ان عدت الى البيت عصراً بعد نهاراً حافلاً من ايام العطلة المدرسية امضيته بين البحر والجناين والحلة التحت ولقيط النبق والالوب وجيت البيت مدجج بالثمار وبالتراب زي الفولة المدمسة والماسورة كعادتها (سرسار) مع انها تتوسد الأرض في نوم عمييق ولا تجود إلا بالقليل و(الطشت ) داخل الحفرة وانا بين الترقب الى كمية كافية من الماء تكفيني وبعد طول إنتظار قدرت الزمن ربما عشرة دقائق إضافية تكفي وإنصرفت لقضاء بعض حاجتي ولما عدت فإذا بي ارى ما لا يسرني الغنماية ام ضقلوم واسمع ليك صوتها في الطشت ( شييب شيييييبب شيييييييييييب ) تلحس في الموية لحس وخلاص وصلت معاي الآخر وقدامي طوبة فايرة وبكل ماأتيت من قوة في كراعها وسمعت ليك صوت ( مييييييييييييييييييييييق ) المألوف لدي لكن هذه المرة كان في منتهى الألم وفرت هاربة على ثلاث وتوارت عن الأنظار وما زلت اسمع صوت ( مييييييييييق ) في الصباح اشوف ليك الغنماية رافعة كراعها ومعووجة وماشة بثلاثة بس ورمتني بنظرة فيها عتاب شديد ادخلت في قلبي الحزن والحنية عليها ، ودخلت البيت سرقت لي عيش في كيس واديتها ليهو وكلما اشوفها اتذكر ذنبي وامشي اشيل ليها عيش من الشوال لحدي ماسمعت امي في يوم قالت ( اتيمنتا الشوال دا في زول بشيل منو كل مرة ماشي نازل ) ، المهم الغنماية خسرت كراعها في المعركة وانا أدمنت سرقت العيش للغنم .ومرت الأيام والغنماية ام دضقلوم بقى إسمها ام كراع معووجة وكمان ولدت عتان وتقرات لكن برضو طالعين شواطين زي امهم لكن تعلمت درس الجلد بالعصا بس بالمناسبة لحدي ماماتت ماعارفين سبب كراعها شنو .

مبــــــــــــــــــــــــــــــــــــــــــــــــــــــــــــــــــــــــــــــــــــــــــــالغة
دي انسب كلمة قدرت قلتها ليك
احييك واحي الغنماية كمان
لكن فايته حد الروعه والجنون
ياسلام عليك لما تفيض وتتدفق مداد
ياسلام عليك لما تمطر وترعش الاجساد
ياسلام عليك ياسلام
اي جدعنا بالدقاق وناعم
تقبل مروري

والله يا ابو سجود قصتك رأئعة مع الغنمايه ام دقل واجمل ما عجبني فيها عندما تضربها ويحصل لها تهور وتكشح جردل العجين والله دي فعلا غنمايه مفتريه ؛؛؛؛؛؛؛؛؛
بس حابي اعرف الاسم الاصلي غير ابوسجود لو تكرمت
انا الطيب العبد الطيب
المملكة العربية السعودية / نجران
وتقبل مروري

ابو سجود
اشحد ربي يديك العافيه
ادخلتنا في جو بديع ورائع روعة قلمك الرشيق
واسلوبك الراقي
وقلبك المن طفولتك رحيم حتى على ام ضلقوم
لك مني الشكر والعرفان

الأخ الطيب ود العبد ( عنتر الصغير ) ارجو ان تفتح هذا الرابط للتعرف على أعضاء المنتدى [ندعوك للتسجيل في المنتدى أو التعريف بنفسك لمعاينة هذا الرابط] ، وهو خاص بالتعارف بين الأعضاء كما ارجو ان تضيف اسمك في هذا البوست

أبو إسلام العزيز ارجو ان تكتب في هذا البوست مذكرات من طفولتك لعلمي انها حافلة ومثيرة وكلها اكشن ههههههههه بالله عليك ياعفيف اكتب لينا هنا

الأخوة الأعضاء هذا البوست مخصص لكتابة ذكريات الطفولة يرجى المشاركة

دمتم

أوووووووووووووووووول شي يا ابو سجود
انا بحييك على إبداعك المنقطع النظير في كتاباتك
وتاني حاجة أحب اشكرك جـــــــــــــداً على هذا البوسط
الذي سيكون بمثابت وسادة نلوذ إليها حينما يرهقنا تعب الغربة
والتوهان بيت العمارات السوامق والأسامي الأجنبية
تسلم تسلم تسلم تسلم يا غالي
أسمعني انا داير أسألك سؤال !!!
ممكن تديني من إبداعك ده حبيبة عشان أقدر أشارك معاكم في البوسط ده
[ندعوك للتسجيل في المنتدى أو التعريف بنفسك لمعاينة هذه الصورة]
كخ كخ كخ كخ كخ كخ كخ
إن شاء الله حبة في كيس ترسلها لي مع أي بتاع تكسي
ولا أقول ليك أنا لو ربنــــــا أحيانا بجيك بي رقبتي
إن شاء الله

الجماعة ماخلو لي حاجة اقولها تسلم ياابو سجود يامبدع
والله حاجة روعة لكن انا قابلته غنم قريبات من غنمايتك دي
لكن اكتر شئ ميزها من الغنم نظرة العتاب الرمتك بيها تاني يوم

تسلم تاني علي تخصيصك للبوست ده مزكرات طفولة لانو حيكون حاجة روعة ان شاء الله
تقبل مروري

العزيز جهاد
مشكور على المرور الدافئ ولكن حد علمي انت مسكون بالإبداع بالمناسبة دي وين حسام والله فقدناه

الشيخ/ الاستاذ وين كتاباتك

والله يا ابو سجود
أنــــا زاااااااااتي فرق علي
بس شكلو مع الإمتحانات وكده
بتمنى يواصل في التواصل وما ينقطع
كلنا فاقدنو رغم إن إطلالتو كانت خفيفة
بس ح يرجع وأحسن من زمان كمان
مشكور على سؤالك وإهتمامك يا غالي

يا كاس النبي الغنماية دي حقة منو

آآآآآي كنت من الدفعة الأولي لمدرسة عمارة أبيد وكانت بداية سنة أولى مبنى نادي التقدم والمدير الاستاذ الجيلي والإستاذة بخيتة لا أعرف كيف بدأت بس اذكر اننا تنادينا إلى النادي في الصباح عشان نبدأ القراية تجمعنا في الصالة ولقينا برش الصلاة حق أعضاء النادي مفروش وجلسنا نستمع إلى الدرس الأول وكنا في قمة الفرح لتجمعنا في ذلك المكان فاكنت الوصـايا من الأستاذ والأهل كالأتي ( أوع واحد فيكم يمشي جنب البير ) توضيح : كان هنالك بير مهجور بالقرب من النادي ( أوعكم تلعبوا بكراسي النادي ) ( بعد ماتقدم الغنم اوعكم تباروا الراعي ) توضيح : سعيد كان يجمع الغنم بالقرب من النادي وكنا نسمع ضحكاته المميزة ومزاحه مع الناس وذات مرة عطش عطشة قوية وضحك بعدها وقال أرحمني يادايم الجنبي بهائم وضحك الحاضرون كل شئ كان يبدو جميلا ورائع حد الروعة منظر القرية وشوارعها الحميمة وناسها الطيبون وعبدالعاطي شيخ الحلة وهو ينهى ويأمر فينا والطيب ود القيحيف لو شافك في الشارع خمجان بدقك وبحلق ليك صلعة بالموس وبعدها بديك تمر تشيل تمرك في يد وشعرك في اليد التانية تاكل وتتنهف ولما تمشي البيت يقولوا ليك بارك الله فيهو نعم إنها عمارة أبيد

الله ياابوسجود معاك ومع ام ضقلوم عدنا الى الزمن الجميل والايام الحوالى ايام كان كل الاهل يجمعهم مسلسل واذكر مرة ونحن متلمين بنتابع فى مسلسل وكان مشوق وجزاب وكان هو احلى مافى اليوم وبقينا نعرف الممثلين دا اسمو منو دى بنت منو طبعا باسمائهم فى المسلسل وكانهم جزء من العائلة بل كنا عائلة الرجال قاعدين فى الناقريب والنسوان قاعدات فى البنابر والصفائح والطوب والشفع افترشوا الارض والمتحنكش فى الشفع قاعد فى سفنجته وفى هذا الجو والمسلسل شغال جاءت ام ضقلوم ولم يحس بها احد رغم انها صاحت فيهم ماغ ماغ ماغ وهذا الموقف جرح احساسها وحلفت لانتقمن فما كان منها الا ان اتجهت الى الاريل الزى يتدلى من اعلى البيت بل من اعلى الصفيحة التى مركب فيها الاريل حق التلفزيون وبين الحيطة والتلفزيون اكلت ام ضقلوم الاريل ولاتسمع لا وش.. وش ..وش وصاح احد الشفع ام ضقلوم امضقلوم اكلت سلك التلفزيون وساد هرج ومرج وهربت ام ضقلوم بعد فعلتها وشفت غليلها والكل يدعى على ام ضقلوم وضاعت جهود عمنا فى اصلاح العطل والزمن يجرى بسرعة والكل يقول ياربى حصل شنو فى المسلسل لحدى مازمن المسلسل خلص ولم يتصلح العطل فغضب عمنا وحلف ام ضقلوم دى مااخليها الا ابيعها ولااضبحا عديل ياولدى كيفن بتضبحا ياحاجة انا حلفت خلاص انا اشتريتا وفى اليوم التالى اتلمينا زى عادتنا وعشان نتاكد انو التلفزيون شغال مايفوتنا المسلسل والحمد لله المسلسل بدى واشتغل شعار المسلسل والكل سكوت ولا تسمع همسة وتدخل ام ضقلوم ماغ ماغ ويقف الكل ام ضقلوم امضقلوم وترتاح ام ضقلوم لهذا الاستقبال الرايع هى دى كراعها مكسورة والكل مسرور البركة تستاهل الله يبارك فى الكسر ليها كراعها ومن اليوم داك صارت ام كراع وانجبت كثير واشهر ما انجبت البعامية بنت ام كراع ودى فاتت امها فى الشيطنة ولها حكايات وحكايات ياها ام ضقلوم

حياك الله وادام ليك نعمة الصحه والعافيه وحفظ ليك ألاموره الجميلة وردا غربتك الي أحضان قريتنا الحبيبه مع الذكريات الجميلة تحياتي للجميع بالتوفيق والعوده تقبل مروري (جون قرنق)

كمال ابومصعب

ههههههههههه اذكر ذلك اليوم جيداً يوم حيرتنا الغنماية وأكلت حتى مسلسلنا

ود الشيخ
إن شاء الله العقبال عندك كتابتك بقت طالع من المسيد ... أحييك وأحي الشرفاء